O Camiño do Mar é unha variante do Camiño do Norte a Santiago de Compostela. Os que optaban por esta vía, unha vez chegaban a Ribadeo continuaban pola costa das provincias de Lugo e parte da Coruña, cunha parada en Santo André de Teixido. Despois incorporábanse en Narón ao Camiño Inglés. Visitaban, deste xeito, aos dous apóstolos. Pero non só era ruta para os que facían o Camiño do Norte. Había tamén a vía de entrada marítima e noutros casos percorrían este trazado os peregrinos á volta de Santiago.

A continuación desta ruta para conectar co Camiño Inglés consiste en realizar, dende Santo André de Teixido ata Cedeira, a Ruta dos Peiraos. A etapa para conectar con Xuvia partiría de Porto do Cabo e chegaría ao Mosteiro de San Martiño, seguindo o trazado do Camiño Vello.